Official press releases

30 October 2026Papiamento

Gobierno di Aruba ta anuncia: Registracion di Short-Term Vacation Rentals ta habri 1 di november pa 12:00 di merdia

ORANJESTAD — Gobierno di Aruba ta anuncia cu e proceso oficial di registracion di Short-Term Vacation Rentals lo habri dia 1 di november 2026, pa 12’or di merdia. E registracion ta forma parti di e plan di accion aproba pa identifica, evalua y regula acomodacionnan turistico di duracion corto na Aruba.

Riba 15 di october 2026, Gobierno di Aruba a anuncia cu lo bin cu un registracion boluntario pa Short-Term Vacation Rentals, y pa cu esaki a instala un Taskforce interministerial.

E Taskforce, cu ta consisti di representantenan di e ministerionan di Finansa y Asuntonan Economico, Infrastructura, Turismo y Salubridad Publico, a concentra den e prome fase aki riba preparacion di un sistema di registracion digital, elaboracion di e condicionnan necesario y coordinacion di e siguiente pasonan di e plan di accion aproba pa Conseho di Minister.

Gobierno ta encurasha tur propietario y operador di Short-Term Vacation Rentals existente pa registra nan acomodacion durante e periodo di registracion, cu lo habri riba 1 di november 2026 y lo sera dia 31 di januari 2027.

E proceso di registracion ta boluntario y lo dura tres luna. Gobierno ta encurasha tur propietario y operador di Short-Term Vacation Rentals existente fuertemente, pa haci uzo di e oportunidad aki pa nan propiedad y/of operacion por wordo registra y evalua den e proceso di regulacion.

E meta di e iniciativa aki ta pa crea mas claridad y siguransa pa e sector, respetando e derechonan existente y evaluando e posibilidadnan di legalisacion, unda cu esaki ta responsabel y legalmente posibel. Alabes, registracion lo permiti Gobierno pa haya un bista mas completo y actualisa di e sector pa por regula esaki na un manera responsabel y sostenibel pa cu e mercado y traha maneho.

Registracion boluntario

Participacion den e proceso di registracion ta boluntario. Esaki ta nifica cu propietario y operador no ta obliga pa registra y no lo haya multa simplemente pa no participa den e registracion. Un sistema di registracion obligatorio basa riba ley ta den preparacion y lo bay Raad van Advies dentro di poco.

Sinembargo Gobierno ta enfatisa e importancia di registra durante e periodo estableci pa por bin na remarca pa cay bou di e maneho temporal di tolerancia “tijdelijke gedoogkader” y pa wordo evalua y considera.

Registracion ta permiti pa identifica y evalua cada acomodacion individualmente, teniendo cuenta cu su situacion actual, e derechonan existente y e reglanan aplicabel. Pa esnan cu ta opera un Short-Term Vacation Rental, registracion ta un paso importante pa crea claridad tocante nan situacion y e posibilidadnan pa futuro.

Si registra, lo cay bou di e Maneho Temporal (Tijdelijke gedoogkader)

E acomodacionnan cu cualifica (activo prome cu 1 di november 2026) y cu wordo registra, lo cay bou di un tijdelijk gedoogkader, un maneho temporal di tolerancia durante e proceso di evaluacion y regulacion.

Esaki ta nifica cu, mientras e Taskforce ta evalua e registracion y determina e siguiente pasonan necesario, e acomodacionnan existente cu ta cay bou di e maneho aki por sigui cu nan operacion actual, dentro di e condicionnan aplicabel.

E maneho temporal ta brinda un periodo di transicion pa Gobierno por evalua cada situacion cuidadosamente sin cu e proceso di registracion mes ta interumpi e actividadnan existente.

Ta importante pa enfatisa cu registracion no ta nifica legalisacion automatico, aprobacion di permiso, ni derecho pa amplia acomodacion. Cada caso lo wordo evalua individualmente pa determina cua derechonan ta existi y cua pasonan adicional por ta necesario y tambe ta depende di cambio di ROPV.

Ken por registra?

E proceso di registracion ta destina principalmente pa e acomodacionnan cu tabata den operacion como Short-Term Vacation Rental prome cu 1 di november 2026, incluyendo esnan cu ya tin cualkier tipo di permiso.

Ademas, e proyectonan cu ainda no tabata den operacion prome cu e fecha aki, pero cu por demostra cu ya a tuma pasonan concreto y a asumi obligacionnan financiero of contractual significativo, por wordo considera pa evaluacion bou di un areglo di transicion.

Esaki por inclui, entre otro, acuerdo di financiamento, contrato di construccion, permiso relevante of comprobante di inversionnan haci prome cu e fecha di referencia. Un idea of intencion so, no ta suficiente pa cualifica.

E Taskforce lo evalua informacion y documentacion presenta pa determina si e acomodacion of proyecto ta cualifica, ta legalisabel y cua proceso ta aplicabel.

Informacion y registracion online

E registracion lo habri oficialmente diadomingo 1 di november 2026 pa 12:00 di merdia y lo keda disponibel durante un periodo di tres luna.

Desde awe, diabierna 30 di october 2026, e interesadonan por bishita e website oficial pa lesa informacion, na vacationrentalregistry.com

Gobierno ta invita tur propietario y operador di Short-Term Vacation Rentals pa informa nan mes bon y haci uzo di e oportunidad aki.

Registrando, bo ta contribui na un bista mas completo di e sector y ta duna Gobierno e informacion necesario pa evalua bo situacion y determina e siguiente pasonan.

Cu e proceso aki, Gobierno ta sigui traha pa logra un balansa, cu ta tene cuenta cu importancia economico di e sector di Short-Term Vacation Rentals, eventual derecho existente y calidad di bida di nos comunidad.

15 October 2026Papiamento

Comunicado Di Prensa

Gobierno ta duna claridad tocante e maneho pa vacation rentals

ORANJESTAD — Conseho di Minister a aproba un plan di accion pa registra y regula vacation rentals na Aruba. E sector a crece hopi den e ultimo añanan y ta forma parti importante di e producto turistico y economia di Aruba. E desaroyo aki ta pidi reglanan cla cu ta tene cuenta cu turismo, vivienda y calidad di bida pa nos comunidad. E meta ta: respeta derechonan existente y evalua caminda legalisacion ta responsabel y posibel.

E plan di gobernacion di AVP-FUTURO ta inclui registracion y regulacion di vacation rentals y e desaroyo di Oranjestad y San Nicolas. Cu e paso aki, gobierno ta duna ehecucion na dicho acuerdonan.

Ken mester registra?

Tur acomodacion existente cu ta wordo uza como vacation rental mester registra, te hasta si e tin e permisonan caba. E periodo di registracion ta tres luna. E fecha di inicio y e ultimo dia pa registra lo wordo anuncia di antemano.

Acomodacionnan cu tabata den operacion prome cu 1 di november 2026 y cu wordo registra, lo pasa door di un proceso di regulacion den cual nan lo wordo evalua como uzo existente. E fecha di referencia di 1 di november 2026 no ta e fecha di inicio di registracion.

Acomodacionnan cu ainda no ta den operacion riba 1 di november 2026 y cu wordo registra, por cay bou di un areglo di transicion (overgangsregeling). Pa esaki, mester por demostra cu prome cu e fecha aki ya a asumi obligacionnan concreto cu ta dificil pa revoca, manera entre otro un acuerdo di financiamento of un contrato di construccion. Un idea so no ta suficiente.

Kico registracion ta nifica?

Registracion ta yuda gobierno haya un bista cla y definitivo di e acomodacionnan existente pa asina por cuminsa traha na implementacion di regulacion di vacation rentals a base di datos. Gobierno ta determina si tin derechonan existente y cua pasonan ta necesario pa tuma pa cumpli cu e regulacion. Si no tin derechonan cu ta permiti e uzo, lo evalua si legalisacion ta posibel y, si ta asina, bou di cua condicionnan y cua pasonan ta necesario. Registracion no ta nifica cu lo duna automaticamente un permiso, legalisa of duna derecho pa amplia e acomodacion.

Derechonan existente ta wordo respeta. Acomodacionnan cu ta wordo uza legalmente por sigui opera dentro di e condicionnan vigente. Si ainda falta algun permiso of otro paso formal, esakinan lo wordo completa.

Acomodacionnan cu no wordo registra ta keda pafo di e areglo y maneho temporal di tolerancia. Esaki ta nifica cu nan no ta wordo considera pa legalisacion.

Un acercamento apropia pa cada area

Gobierno ta distingui tres categoria di area. Cada acomodacion lo wordo evalua individualmente. E resultado di e evaluacion ta determina si legalisacion ta posibel y bou di cua condicionnan. Registracion no ta un garantia pa legalisacion.

Categoria berde: e areanan indica den ROPV como Centrum Oranjestad, Havenfront Oranjestad, Centrum San Nicolas, Toeristisch gebied Westkust y Toeristisch gebied Oostkust. Lo evalua si e acomodacionnan existente por wordo legalisa. Legalisacion ta posibel solamente caminda esaki ta responsabel y legalmente permiti, y e acomodacion ta cumpli cu e condicionnan. Caminda ta necesario, lo prepara un amienda via e ROPV vigente.

Categoria geel: e areanan indica den ROPV como Stedelijk woongebied, Woongebied met waarden y Transformatiegebied. Lo evalua pa cada acomodacion existente si legalisacion ta posibel dentro di e reglanan y condicionnan cu lo wordo establece. Durante e revision integral di ROP y ROPV, lo determina na unda, den cua forma y bou di cua condicionnan vacation rentals ta posibel.

Categoria cora: e areanan indica den ROPV como Natuur en landschap, Strand, Landelijk gebied, Luchthaven, Bedrijventerrein Barcadera, Bedrijventerrein San Nicolas, Marinegebied y Marinezones. No lo tin un legalisacion general. Proteccion y funcion existente di e area ta keda prioridad. Derechonan existente ta wordo respeta. Rekisitonan specifico pa hasi excepcion lo wordo evalua pa cada caso.

Kico lo wordo evalua?

E cantidad di unidadnan y e capacidad pa acomoda huespednan ta forma e base pa e evaluacion. A base di e cantidadnan aki, lo evalua si e acomodacion ta cumpli cu rekisitonan di siguridad, si e ta pas den e bario y si e ta apropia pa e area. Lo tene cuenta cu e edificio y seguridad contra candela. Tambe lo evalua, entre otro, parkeo, accesibilidad, molester den bario, awa sushi y proteccion di naturalesa, paisahe y patrimonio. E exigencianan di calidad lo wordo elabora mas detayadamente.

Si un acomodacion wordo legalisa, esaki ta solamente pa e uzo y cantidad di unidadnan cu gobierno a evalua y aproba. Esaki no ta duna permiso pa agrega unidadnan of amplia.

Kico ta aplica den e periodo di transicion?

Gobierno lo prepara un maneho temporal pa tolera uzo existente cu a wordo registra (gedoogbeleid). E maneho aki ta wordo evalua juridicamente y aproba prome cu e por wordo aplica.

E maneho temporal no ta duna espacio pa habri acomodacionnan nobo, agrega unidadnan ni amplia acomodacionnan existente. Den areanan vulnerabel lo aplica condicionnan mas estricto.

Plannan pa centro di Oranjestad y San Nicolas

E ROPV actual ta permiti un maximo combina di 100 unidad di vacation rentals pa centronan di Oranjestad y San Nicolas. Pa stimula e desaroyo di e dos areanan aki, gobierno ta duna e posibilidad pa registra tambe plannan nobo di vacation rentals.

E datonan di registracion y un evaluacion di cada area lo yuda determina cuanto unidad di vacation rental ta posibel y cuanto espacio ta necesario pa vivienda, tienda, restaurante y otro actividadnan den e centronan. Registracion di un plan no ta nifica aprobacion. Cada proyecto lo wordo evalua separadamente.

Proyectonan nobo pafo di e centronan di Oranjestad y San Nicolas no ta cay bou di e areglo aki.

Taskforce y siguiente pasonan

Un taskforce cu representantenan di e ministerionan di Finansa y Economia, Infrastructura, Salubridad Publico y Turismo lo coordina e registracion, traha riba e condicionnan y lo reporta esakinan na Conseho di Minister.

E taskforce ta prepara e registracion digital y lo anuncia di antemano ki dia y con por registra, y cua informacion y documentonan mester entrega.

Gobierno lo traha via dos ruta: caminda ta posibel, lo prepara amiendanan na e ROPV vigente. Na mes momento, lo cuminsa e revision integral di ROP y ROPV.

Tanto pa un amienda di ROPV exitente como pa e revision integral di ROP y ROPV, e concepto di plannan lo wordo poni na disposicion di publico pa consulta (terinzagelegging). Habitantenan, empresarionan y otro partidonan involucra lo por entrega reaccionnan formal (zienswijzen) prome cu tuma e decision final. Tambe lo tin reunion informativo prome cu e terinzagelegging, pa duna splicacion y contesta preguntanan. Lo anuncia di antemano ki dia y con por participa.

Pronto e taskforce lo anuncia e canalnan di comunicacion caminda por haya informacion y haci pregunta.